2008-05-22

الف شكر


الف شكر

كلمة بسيطة مش لاقى غيرها عشان اقولها لناس بجد عمرى ما شفتوهم ولا شافونى الا عن طريق مدونتى البسيطة اللى ليها الفضل فى انى اتعرفت عليهم وطبعاً الفضل لله رب العالمين من قبل ومن بعد

بالصدفة بفتح اميلى امبارح عشان الاقى ايميل من محمد كمال حسن صاحب فكرة مدونات مصرية واللى بيقولى فيه انهم اختارونى من ضمن مجموعة مدونين عشان نشارك بموضوعاتنا فى فى اول اصدار للكتاب ده وبالفعل محمد اختار موضوع ليا اسمه النفق وكان ضمن المواضيع اللى ضمها الكتاب وعرفت من محمد ان حفل توقيع الكتاب يوم الاربع يعنى النهاردة الساعة 6 بتوقيت مصر وطبعاً لانى مش فى مصر الفترة دى ولانى عرفت الموضوع بالصدفة مقدرتش اعمل حاجة غير انى افرح ايوة افرح مع انى مش هكون معاهم ومع انى بينى وبينهم اكتر من ساعتين طيران لكن انا بجد فرحان مش عشان ضمو موضوع خاص بيا للكتاب وده طبعاً شرف كبير ليا بس عشان اتأكدت ان لسة فى ناس ممكن بتكون بتحب ومهتمة بـــ ايمن فاروق


محمد كمال حسن

مصطفى الحسينى

لكم منى الف شكر وتقدير وتحية

بشكركم
Could have rights too far but also would be very happy because there are those who love Him and taking care of himself
This strange world!!!

Labels:

2008-05-10

اجمل يوم فى مصر

من تانى ماشى بس المرة دى بالذات معرفشى انا راجع تانى امتى او هغيب لاد ايه بس بقول يارب
امبارح كان يوم جميل جداً من ايامى كان عقد قران اختى الصغيرة وفرحت جداً لانى كنت جنبها وانى جيت فى الوقت الضايع قبل كتب الكتاب فى مشيخة الازهر بلحظات قليلة جدا عشان اكون انا وكيلها بدل عمى الكبير ايوة ماهو انا اخوها وابوها حضنتنى بقوة لاول مرة فى حياتها تعمل كدة وفى ناس شايفاها وكتبنا الكتاب وفرحنا كلنا وكان
اجمل يوم فى مصر
وتعدى الساعات دقايق ومن تانى بفتح شنطتى عشان ارتب هدومى واستعد للسفر بعد 48 ساعة من وصولى لمصر
كل اللى عايز اقولو دعاء بسيط دايماً بردده
اللهم انى اسألك الصبر فى القضاء
ومنازل الشهداء
وعيش السعداء
والنصر على الاعداء
ومرافقة الانياء
يارب العالمين
امين يا ارحم الراحمين
واشوفكم من تانى على خير
ان شاء الله
سلام

2008-05-09

كبر الغرام

السلام عليكم ورحمة الله وبركاته
انا لسة واصل مصر من كام ساعة وفاضل كام ساعة على كتب الكتاب اللى قطعت سفرى وجيت عشانه لانه طبعاً كتب كتاب لاجمل واحلى بنت فى العالم كله وارق واجدع بنت فى العالم ده كله لتانى مرة بدخل مشيخة الازهر واكون وكيل لعروسة النهاردة وبعد كام ساعة كتب كتاب اختى الصغيرة اللى سيبت الدنيا كلها وجيتلها واكون جنبها اخ واب انا فرحان اوى مع انى مش هقدر اقعد فى مصر غير 24 ساعة بعد كتب الكتاب بس كفاية انى هسافر تانى وانا فى قلبى فرحة هتخلينى مبتسم وسعيد لمدة سنة قدام
ربنا يتملك على خير
يا حبيبة اخوكى