حرارة مرتفعة

شعورى من ناحيتك قل........ حبى ليكى انتهى
حبى ليك مش زى زمان....... حبنا مات.... حبنا لازم يموت
كل دى مفردات بنسمعها من واحد او واحده معرفوش يعنى ايه حب او ايه معنى كلمة حب بستغرب لما بسمع الكلام ده وبسأل نفسى يعنى ايه شعور بيقل ويعنى ايه حيى ليك انتهى هوا الشعور بيقل طيب ازاى ولا الحب بينتهى طب وده ممكن وينفع اقول لحد ان حبى ليك مش زى زمان طيب هوا زمان كان ايه ودلوقتى بقى ايه
احنا اللى اتغيرنا ولا الزمن اللى اتغير ولا الحب هوا اللى اتغير
انا شايف ان العيب فينا احنا مش فى الحب لان الحب اكبر من انه يموت او يقل او ينتهى لكن احنا دايما بنجيب العيب على الحب وبنشوهه
الابسط اننا نعترف اننا معرفناش نحب او اننا متوفقناش فى الحب عشان مكنش اصلا حب احسن من اننا نعتبر الحب شماعة نعلق عليها كل اخطاءنا ونتهمه بأتهامات هوا برىء منها

دايما بنقول الشمس غابت

لكن

الشمس عمرها ما غا بت

الارض هيا اللى دارت ولفت ومن تانى بترجع للشمس
لكن الشمس عمرها ما غا بت
الشمس مركز والارض كتلة صلبة من ضمن مجموعة بتدور فى محورها
الشمس بتمدنا بالدفا فى الشتا وبنقولها الله عليكى
وفى الصيف بنبعد عنها ونلعنها
ومن تانى بنرجعلها
عشان ملناش غنى عنها
الحب كده
الحب عمره ما غاب
احنا اللى بنغيب عنه وبنلف وندور حواليه
ومن تانى بنرجعله
الحب بيمدنا بالدفا فى لحظات الحزن والاسى
وساعات كتير بنهرب من لهيبه وحريقه
وف الاخر تانى بنرجعله

الحب و الشمس

ليهم نفس درجة الحرارة

حرارة مرتفعة

محتاجلك

كلها كام ساعه ونحتفل بعيد الام وعشان كده انا حبيت احكيلكم عن حكايه حصلتلى من حوالى 8 سنين يعنى بعد وفاة والدتى الغاليه بكام شهر كنت سهران مع صاحبى فى بيته والوقت خدنا وقالى انت تبات معايا النهارده كنا فى رمضان اول رمضان يعدى عليا من غير امى صلينا الفجر وصاحبى نام وانا قعدت اقرا فى المصحف لغايه ما حسيت انى عايز انام روحت مغمض عينى وحاولت انام عدت لحظات وفوجئت ان باب الاوضه اللى نايم فيها بيتفتح وامى بتدخل الاوضه عليا ومدت ايديها ليا روحت ماسك ايديها ومش قادر اتكلم وعينى من كتر الدموع بقت مش شايفه كويس لقيت امى بتدينى فلوس مش عارف اد ايه لكن كانت فلوس ومسكت الفلوس دى بأيدى وحسيت بيها عادل صاحبى كان نايم فى السرير اللى جنبى قومت قايم من السرير وعينى منزلتش من على امى كنت عايز اصحى عادل قعدت اصحى فيه وفجأة لقيتنى واقف وعادل هوا كمان واقف فى نص الاوضه وعمال يهز فيا ويقولى ايمن مالك مالك بعديها فوقت واتأكدت انى كنت بحلم عدى النهار والمغرب اذن وفطرنا واخواتى راحو يصلو العشا والتراويح وانا كنت فى البيت بستعد انى انزل وسمعت صوت خبط على الباب روحت فاتح لقيت راجل كبير فى السن ودقنه بيضاء لون التلج وكان بيبتسم وسلم عليا ورديت انا السلام وقالى عندى ليك امانه قولتلو خير قام مدينى فلوس وقالى دى امانه ليك وقولت اوصلهالك بنفسى سألته من مين الفلوس دى والا مش هاخدها قالى من عنده قولتلو مين هوا طيب قالى من عنده وكان لسة بيبتسم سرحت لحظه وافتكرت امى والحلم اللى جانى والفلوس ولسه هقولو اتفضل بصيت ملقيتهوش قدامى نزل وانا سرحان فى الحلم اللى جالى الظاهر انى سرحت كتير وقتها فعلا كنت بمر بظروف ماديه صعبه لانى كنت لسة بدرس وكنت محتاج الفلوس فعلا ولقيت المبلغ كبير اكبر من المبلغ اللى كنت عايزه بكتير ساعتها قعدت ابكى لغايه ما اخواتى رجعو من الصلاة وحكيتلهم القصة ومحدش فيهم رد عليا بس قالولى ان امى حاسة بيا رغم انها توفت وبقت فى عالم تانى ودار تانيه لكن حست بيا حست بأبنها وهو محتاج وهو تعبان سبحان الله وحشتنى اوى نفسى اشوفها نفسى احس بحصنها نفسى ابكى واضحك بين اديها كل عيد ام وانتى طيبه هصلى وادعيلك فى عيدك زى كل سنه ودى اكتر حاجه ممكن اعملها
وحشتينى اوى

يااااه

اسماء

كان عندها سبع سنين

عرفتها اثناء توجهنا للتبرع بالدم لمعهد الاورام القصر العينى قسم الاطفال

سمراء اللون شعرها طويل ومنكوش

اخف دم شفتو فى حياتى

بتفكرنى بالبنت السمرا اللى فى اغنيه كاظم الساهر اللى طالع فيها سواق مدرسة وبيفسحهم اظن ان اسم الاغنية دلع

الكلام ده من حوالى شهرين كان يوم خميس

خدو الدم منى ومن يحيى صاحبى

وطلعنا الدور الخامس

وانا داخل الدور سمعت صوت بنت بتضحك اوى لدرجة ان كل الموجودين ضحكو على طريقة وجمال ضحكتها

عينى عمالة تدور على مصدر الضحكة

ولقيتها

البنت السمرا اللى كانت بتهزر مع الممرضه والممرضه عمالة تزغزها

وعرفنا بعد كدة ان ده اول يوم ليها فى المستشفى والمفروض ان مامتها تسيبها وتروح

وقبل ما نسمعها بتضحك كده كانت بتعيط ومش عايزة مامتها تروح وكانت خايفة ومرعوبه وعشان كده الممرضه قعدت تهزر معاها وتضحكها عشان تكسر الخوف جواها وفعلا ضحكت اسماء واحنا سمعنا احلى ضحكة فى حياتنا

الله يرحمها

عرفت من يحيى ان اسماء توفت يوم الخميس اللى فات

لسه سامع صوت ضحكتها

صرخه

كنت زهقان مش عارف اعمل ايه ولو عملت حاجه ببقى مش عارف انا عملت ايه

طب ليه ؟؟

قابلتها وكنت رايح عشان اصرخ قدامها بكل اللى جوايا

كنا شايفين مصر كلها من فوق

ايوة كنا فوق

وقلت احكى واتكلم وافضفض واقول يمكن اعرف انا مالى وعايزايه

سمعتنى وقالتلى ايمن انت حد كويس وطيب اوى

استغربت مكنتش عايز رأيها فيا

وقالت

حب نفسك من اجل ان يحبك الاخرين وعندما تحب نفسك ستعرف كيف تحب الاخرين

سمعتها وسكت بس اكنشفت انى خلاص صرخت وهيا سمعتنى ولقتلى حل لمشكلتى

كل ده واحنا فوق شايفين كل القاهره من فوق

ايوة كنا فوق

واكتشفت بعد نهاية اللقاء انى مش بس اللى صرخت

وهيا كمان صرخت وسمعتها وكنا شايفين كل القاهره من فوق

وايوة كنا فوق

فوق قوى

اشكرك

...............................................