دستوراه مع مرتبة الشرف

مـع انى بحب البلد دى زى اى حد ما بيحبها لكن انا مبحبش اتكلم عن اى حدث بيحصل جوة البلد يعنى ساعة انتخابات الرئاسة اللى فاتت كلنا قرينا المعارضة قالت ايه والمدونين بالذات اغلبهم عمل ايه وقامت الدنيا بس قعدت تانى وبسرعة لأن الوضع فضل على ماهوا عليه ومن حق الكبير يدلع

بنقول عندنا سياسة وانتخاباااااااااات وقوانين ومعارضة

طوز

ايوة طوز على رأى اميرة

كل ده ضحك على الدقون والشىء لزوم الشىء ماهو عشان العالم يقول علينا دولة ديمقراطية متحضرة لازم نقول ان فيه سياسة وفيه معارضة وفيه قوانين بتتعدل لمزيد من الحرية ,لكن الحقيقية تمثيلية بس بايخة والمخرج عايز كده

بالنسبة للسياسة...... فسياسة خالتى ام اشرف احسن منها

وبالنسبة للقوانين ...... فهى قوانين فعلاً وبتطبق بس علـــ غلابة

نضال ومناضلين الف تحية وسلام ليهم هما فعلاً ابطال بس من ورق زى احلامناً اللى عاملة زى الطيارة ..... الطيارة الورق اللى كل ما

زادت الريح عليها طارت اكتر لكن نقطتين مطر يوقعوها

فى الماضى البسيط لما وحدنا جبهتنا ووحدنا كلمتنا طردنا الملك وبعديه الانجليز واممنا القناة وقولنا هنبنى وادينا بنينا السد العالى ولما فرحنا واتفاخرنا بنصرنا وقعنا ولقينا نفسنا وسط نكسة

واتحدنا تانى وعبرنا

وفرحنا تانى ومتعلمناش من غلطنا الاولانى وكل واحد فكر فــ نفسه ونسينا وبيعنا القضية ماهو انفتاح وويسكى

شوفو وصلنا لأيه من اخر انتصار لينا لغاية دلوقتى

ذل مهانة معانة وفقر والعالم بيتفرج ويضحك عليا

القلوب معدش فيها مكان للحب , للحنان لأن الحزن ماليها

الوشوش كرمشت وعجزت من قلة الابتسام

المشكلة اننا بعيد عن بعض وكل واحد فينا اختار سكته لغاية ما كترت السكك وتوهنا عن بعض

زعلنا اوى من التعديلات الاخيرة على الدستور المصرى مش عارف ليه طب وايه الفرق ماهو فى تعديلات يومية على حياتنا كلها اشمعنى الدستور اللى اعترضنا عليه والمعارضة

اتكلمت وشجبت ونددت

فاكرين اخر مرة انتصرنا فيها كانت امتى؟؟؟؟؟

عارفين ايه الدستور اللى لازم يتغير؟

دستورنا احنا دستورنا اللى جوانا مش عايزين كلمة تجمعنا وعصايا تفرقنا

عايزين الحب يجمعنا والموت هوا اللى يفرقنا

نخلى طريقنا واحد وحلمنا واحد

ساعتها هيبقى معانا

دستوراه مع مرتبة الشرف

الشنطة

كتير مننا اتعرض لظروف مادية صعبة فى فترات معينة فى حياته ادت بالتالى الى تدهور حااااااااد لحالته النفسية والمعنوية بل والمعدوية فى بعض الاحيان

ونتيجة لكده كتير اوى مننا بدأ يحلم بمزاجه يحلم بأيه يحلم بالشنطة

الشنطة !!!! ؟

ايوة الشنطة ....... الشنطة اللى جواها دهب وياقوت وساعات مرجان وكمان حب الرومان انشالله محد حوش
وساعات بيبقى جواها فلوس بس مش اى فلوس لازم تكون ورق عنب يعنى اخضر دولارات ....دولارات
وتبتدى رحلة الاحلام وسلسلة الاوهام
فى ناس حلمت بشنطة جواها تلت اربع تلاف جنيه مش اكتر من كده عشان يدفعو بيهم مقدم اوضة نوم مصنوعة من خشب صناديق الرنجة او حتى سفرة ولا صالون
او شقة ايجار جديد فى وسط صحرا ف مدينة جديدة متسمعش فيها اذان.... واهى عيشة والسلام
وكل ده عشان يحقق حلمه هوا وخطيبته والبيت بتاعهم يبنوه سوا طوبة محبة وطوبة غرام
ويفوق صاحبنا من الاحلام لا يلاقى الشنطة ولا الحب ويكون الحلم كأنه ما كان
ويبتدى يفوق ويفكر والرب سبحانه مالك كل شىء بيساعد وبيدبر
ويلاقى الشنطة
وواحد تانى بيحلم بشنطة فيها ارنب ولا اتنين لزوم العربية والموزتين ويصحى برضو لا يلاقى شنطة ولا عربية ولا حتى موزة مش موزتين
ويكمل نوم ويتغطى وده دايما بيكون
خسران
وموظف غلبان يحلم بالشنطه .... وحطة يا بطة ويوم ما يتمطع اوى فى الحلم يحلم بوديعة ف بنك يصرف من ارباحها ولما البنت تكبر يجهزها والواد يدخله الشرطة
لكن للأسف يصحى اخينا على صوت الولية
قوم يا رااااااجل
يا فوزى قوووووووووووووم
دى الانبوبة فضيت والراجل بتاع الدش حالف لايقطع الوصلة عشان مدفعناش الشهرية
والمحروس ااااااااابنك
مالو يا ولية
ابنك يا راجل كان بيلعب كورة وضيع الشنطة

فوزى مذعور: الشنطة

كلنا بندور على الشنطة بس المهم احنا عايزين ايه جواها فى منا

اللى لاقاها وفى منا اللى لسة بيدور

فى اللى عايز شنطة نجاح واللى عايز شنطة صبر واللى عايز شنطة طموح

واللى عايز شنطة امل

وفى كمان اللى عايز شنطة فلوس وشنطة حظ

فى بلدنا مصر المحروسة اكتر من خمسة وعشرين مليون شاب بيحلمو بالشنطة
يارب يلاقى كل واحد فينا شنطته

بس بلاش نمشى ندور فى الارض عشان مش هنلاقى غير شنط واكياس زبالة

خلى شنطتنا قدامنا وخلى راسنا دايما مرفوعة واحنا بندور عليها

ياترى الشنطة هيبقى فيها ايه؟؟؟؟؟؟؟