2008-01-06

النفق


راجل عجوز بيحاول يعدى الطريق يتقدم خطوة ويرجع خطوة العربيات كأنها بتتسابق وصوت كلاكستها يوقع القلب ورغم كده كان بيحاول يعدى روحتله ووقفت جانبه ومسكت ايده وقولتلو نعدى سوا ضحكلى ولسة هعدى لقيتنى برجع مش خطوة لاء خطوتين حسيت بالخوف مع انها مش اول مرة اعدى طريق وفيه عربيات بتجرى مش عارف..... وفضلنا واقفين نراقب العربيات المجنونة وبنستنى الفرصة عشان نعدى سرحت بخيالى لقيت علامة بتدل على وجود نفق قريب من هنا رحنا النفق ونزلنا سلمة سلمة ولقيتنى ماسك فى ايد الراجل العجوز مش هوا اللى ماسك فى ايدى كانت الدنيا زحمة كانت الناس كتير ومستعجلة وكأنها بتجرى كان الارهاق والتعب واليأس باين عليهم يمكن عشان الدنيا حر ممكن. كان النفق ضلمة والدنيا كانت فعلا حر مكنتش شايف كويس بس كنت حاسس حاسس بنبض ايد الراجل العجوز اللى كان بيزيد كل شوية وصوت نفسه اللى كان بيعلى شوية بشوية وسمعت صوت خطوات كتيرة كانت اكيد للناس مع صوت نفسهم المرهق ودقات قلوبهم بيهربو وخايفين من كل حاجة الا الموت كنت بحاول امشى بسرعة عشان اعدى الناحية التانية واخلص من الحر والزحمة وقفت لما شوفت النور الابيض فى اخر النفق ومقدرتش اكمل والناس من حوليا بتعدى وبتخبط فيا فلتت ايد الراجل العجوز من ايدى خطفتها زحمة الناس كنت بحاول امسك ايده تانى لكنى معرفتش وهوا كان بحاول يمد ايده لكنه برضو مقدرشى
وفوقت
من سرحانى على ضغطة من ايد الراجل على ايديا ولقيتنى لسة واقف ومستنى اعدى بالراجل العجوز راح قايلى انا عطلتك يا بنى انا ههمشى قدام فيه نفق انا متشكر ليك
وادانى ضهره ومشى مشيت وراه ومسكت ايده وقولتلو يا حاج لسة بدرى عالنفق
احنا
!هنعدى الطريق
هو
مقولتليش انت اسمك ايه؟؟؟؟؟
ياترى هنعرف نعدى ولا هيعدو ويتعدو علينا اكتر من
!!!! كده

Labels:

20 Comments:

Anonymous Anonymous said...

صدقنى حسستنى انا واقفة معاكو..بنزل النفق معاكو..حاسة بالهلع لما سيبتوا ايدين بعض..تسلم ايديك

January 5, 2008 at 1:54:00 AM GMT+2  
Blogger نوسه said...

فكرتنى بنفسى
والله بتحاشى انى اعدى اى طريق وبفضل اتحايل لحد ماالاقى طريق مفيهوش عربيات او شارع جانبى هيوصلنى من غير مااعدى
بس مش دايما بلاقى
وفى الحاله دى بضطر استنى اى حد يعدى معايا وابقى جنبه او اعدى لوحدى وانا ركبى بتخبط فى بعض
وصفك جميل اوى للموقف

January 6, 2008 at 4:52:00 AM GMT+2  
Blogger esraa said...

ان شاء الله هنعدي ومحدش هيقدر يعدي علينا

January 7, 2008 at 1:51:00 AM GMT+2  
Blogger نقطة مية said...

عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم

January 7, 2008 at 10:49:00 PM GMT+2  
Blogger ذو النون المصري said...

كتير لما بتعرض لمثل هذا الموقف و فعلا باحس اني لما هكبر هتبقي مشكله بالنسبه لي اني اعبر طريق
مش كفايه ان الانسان يحترم نفسه حتي تحترم ادميته باقيا لناس
الظاهر ان مفيش حلول الا بالثوره علي الانسان الغلط اللي فينا من جوه
من الداخل

January 8, 2008 at 12:08:00 AM GMT+2  
Blogger وينكى said...

كل سنه وانتم طيبين
وحبيت أعزمكم على حفل افتتاح دار الكتب بتاعت صاحب البوابه , زميلنا البلوجرى الفظيع
ودا هايكون يوم الخميس 10 يناير الساعه 6 مساءا فى مكتبة البلد , 31 شارع محمد محمود بالتحرير
عاوزين تواجد مكثف هناك
مستنيينكواااااااااااا

January 8, 2008 at 10:46:00 PM GMT+2  
Blogger لحظة تأمل said...

حمدلله على السلامة
بجد بستنى كلامك دايما وبفرح قوى لما تكتب حاجة جديدة

انا قريت موضوعك اكتر من مرة عشان اعرف اكتب تعليق

بس تعرف برغم الزحمة وان مفيش حد حاسس بالتانى لكن اوقات بنحتاج نحس بنبض ايد الراجل العجوز عشان نعرف نتحدى الزحمة اللى حوالينا ونلاقى حاجة تخلينا نعدى الطريق

تحياتى

January 9, 2008 at 5:56:00 PM GMT+2  
Blogger Blank-Socrate said...

ناس راكبه عربيه و ناس ماشيه على رجليها و اللى راكب مش راحم اللى ماشى و اللى ماشى مش راحم اللى مش قادر يمشى و الاخير لسه مش قادر يقبل دا من ربنا

January 10, 2008 at 2:53:00 PM GMT+2  
Blogger mohamed kamal hassan said...

تدوينة رائعة
عجبتنى جدًا
رغم علامات الترقيم التائهة
وآخر سطر
بس بجد عجبتنى
تسلم إيدك



ـــــــــ
على فكرة بعتلك إيميل يا ريت تبص عليه
شكرًا

January 12, 2008 at 1:08:00 AM GMT+2  
Blogger micheal said...

من واقع الحياه أؤكد لك كله حيعدي عل يكله
فوضي يعني
ليييك وحشه يا يامن
تحياتي

January 14, 2008 at 3:09:00 PM GMT+2  
Blogger Ahmed Al-Sabbagh said...

هنعدى ان شاء الله

كلمات جميلة

تحياتى

أحمد

January 15, 2008 at 4:33:00 PM GMT+2  
Blogger MAKSOFA said...

حلوه قوي القصه وفعلا ياتري حانعرف نعدي والا حايعدو علينا
==================
أشكرك لدعمك ومساندتك لي

January 19, 2008 at 1:21:00 AM GMT+2  
Blogger appy said...

هنعدىىىىىىىىىىى صدقنى اكيد هنعدى

January 19, 2008 at 1:11:00 PM GMT+2  
Blogger Memo said...

الخوف من بكرة افة العصر

مفيش فايدة

January 20, 2008 at 12:46:00 PM GMT+2  
Blogger ايوية said...

تفتكر لو كل واحد من الى سايقين بسرعة جنونية نسى للحظة ان عندة عربية واتخيل انة هو الراجل العجوز دة هيقفوا لحد ميعدى ولا انانيتهم برضة هتاخدهم

January 20, 2008 at 4:11:00 PM GMT+2  
Blogger zordeak said...

الله عليك يا ايمن

حلوة اوى التدوينة دى

بس انا عارف انك متفاءل

واكيييييييييد هتعدى

ومش هتقف

وهتوصل

وعد من اخوك الصغير

:)

January 22, 2008 at 12:32:00 AM GMT+2  
Blogger nouna said...

خليك متفائل هنعدى
ياما دقت على الرأس طبول وباما مصر شافت وعدى عليها وعدينا

January 24, 2008 at 2:25:00 PM GMT+2  
Blogger raspoutine said...

السلام عليكم

ازيكم بقاااااااااا


anonymous

تسلمى

..............

نوسة

كلنا كنا بنخاف من الطريق وعربياته
لكن انا هنا حاولت اصور الطريق بالحياة اللى عيشنها او اللى بنحاول اننا بعيشها والراجل العجوز هوا الماضى والشاب هوا المستقبل اللى لازم يعدى

شرفتينا

............................
اسراء
ان شاء الله يا اسراء هنعدى
بس على فين وامتى لسة مش عارفين

...................

ذو النون المصرى
اهلاً بيك ليك واحشة وشكرا على تعليقك على الموضوع ده

.........................

لحظة تأمل

الله يسلمك
وشكرا للكلام الجميل ده جدا
......................


بلانك سيكريت

لاء والله الموضوع مش كده
صدقنى فى ناس راضية بأقل من كده يعنى الرضا موجود والحمد لله
بس الرحمة مطلوبة


......................

محمد كامل حسن


شكرا ليك ولتعليقك
علامات الترقيم دى اعتبرها خطواتى انا وصاحبنا العجوز

اشكرك



......................


مايكل


شكرا وحشتنى بجد

....................


احمد الصباغ

شكرا يا احمد

انت اللى جميل

............................

مكسوفة


انا دلوقتى سعيد جدا لرجوعك بينا بين الناس اللى بيحبوكى
بشكرك


.................

appy

ان شاء الله

بشكرك

..................


ميمو

وكل آفة وليها دوا

..................ز



ايوية

لو قفو هيخبطو فى بعض وهتبقى ازمة مروريه واحنا اللى هنرو فى الرجلين برضو

...........................

zordeak

اكيد هنعدى يا احمد
والله دخلتك عليا كده بتخلينى اتفاءل
شكراً يا صاحبى

....................

نونا
انتى غيرتى اسمك كويس جدا
اولا حمد لله على السلامة
ثانياً انا متفاءل اهو
انا كتبت زى ما انتى قولتيلى والاجازة الجاية لازم تكون اطول من كده

January 24, 2008 at 8:22:00 PM GMT+2  
Blogger جسر الى الحياة said...

تهيالى يا ايمن قرار اننا نعدى النفق ده لازم ينبع من جوانا لو حبينا نعدى هنعدى ولو خفنا هنفضل واقفين فى مكاننا محلك سر

March 5, 2008 at 9:31:00 PM GMT+2  
Blogger will said...

This comment has been removed by a blog administrator.

March 31, 2009 at 9:43:00 AM GMT+2  

Post a Comment

Subscribe to Post Comments [Atom]

Links to this post:

Create a Link

<< Home