2008-04-16

عفوأ ايها المضربون


من كام يوم جاتلى دعوة من احد الجروبات على الفيسبوك والجروب ده متبنى فكرة الاضراب يوم 4/ 5 الجاى انا مش شايف ان فكرة الاضراب هتنفع على الاقل فى الوقت ده مجتمعنا لسة مخدش على جو الديمقراطية وحرية التعبير عن الرآى لسة بدرى شوية علينا احنا مجتمع مشحون حبتين وجوانا ضغط عالى وكتير اوى عندهم كبت وما هنصدق نشوف مظاهرة عشان نهتف ونقول لاء احنا لما بنقول لاء بنقولها لكل حاجة الزوج بيقولها لمراته اللى قاعدة فى البيت عشان زهق من عمايلها والزوجة بتقولها عشان جوزها اللى بيشخر وهو نايم والطفل هو كمان بيقولها لابوه عشان يزودلو مصروفو

يعنى مش بس بنقولها عشان الظروف والاوضاع تتغير

فكرة تانية على الفيس بوك بتدعو الى كتابة كلمة لاء على الجنيه المصرى كرسالة للريس وكعلامة احتاجية على الوضع الراهن اللى بنعيشو كلنا وانا برضو مش مع الفكرة دى

تفتكرو هو ده الحل اننا نكتب على الجنيه المصرى ونشوهو اكتر ما هو متشوه خلقة طيب ياترى ممكن نلاقى مكان فاضى على الجنيه عشان نكتب عليه كلمة لاء طب تقتكرو ان الريس هيهمه تفتكرو انه بيتعامل بالجنيه المصرى اساساً

مفتكرش

بأدينا بنلطخ تاريخنا وحاضرنا ومستقبلنا

وبأدينا بنحفظ ماضينا وبنجمل حاضرنا وبأدينا نخلى مستقبلنا احسن

انا مش مع فكرة الاضراب الغير منظم واللى ملهوش رابط ولا حاكم

وانا مش مع فكرة تلطيخ الجنيه المصرة بحبر اقلامنا

ده الضرب فى الميت حرام ياخونا

13 Comments:

Blogger فراشة said...

واخيرا لقيت حد عاقل اكلمه انا معاك انالاضراب مش هيجيب فايده انا رائي ان ده احتجاج او اسلوب سلبي يظهر ان حتى اسلوبنا في الاعتراض اتاثر بسلبيتنا الاضراب اللي عاملينه يظهر كانوا عايزين ياجذوا شويه في بيتهم

وحلوة حكاية لا على الجنيه دى كمان برضه سلبيه
مفيش فايده انا قريت مره ان مصر البلد الوحيد اللي ممكن يتعرض لتخلف حضاري وبرضه مش هيقوم بثورة

يالله ماعلينا والنبي حد يسلفنى الجنيه اللي عاوزين يكتوبوا عليه ده
بتاعى انا مليش دعوه انا اللي لقيته الاول

April 16, 2008 at 1:03:00 PM GMT+2  
Blogger حاجات جوايا said...

أنا معاك جدااااااااا فى فكرة عدم الاضراب المنظم

وكمان أصلا انا ضد الاضراب التانى ده

من ناحية لان البلد مش ناقصة حاجة تعطلها
ومن ناحية تانية لان موعده قريب جدا ومفيش فرصة لتحقيق رغبات الشعب فى الشهر ده
وغير كده كمان الريس هيلقى خطبة يوم 5 مايو وعايزة اشوف هيقول ايه
وعندى امل كبير فى اصلاح اوضاع البلد فى الفترة الجاية من غير اضراب ولا اصابات

مشكور اخى على موضوعك وعلى زيارتك
دمت بخير
سالى

April 16, 2008 at 4:45:00 PM GMT+2  
Blogger لحظة تأمل said...

انا متفقة معاك فى فكرة اننا لسه بدرى شوية على موضوع الاضراب

وكمان فعلا الضرب فى الجنيه اكتر من كده حرام

احنا محتاجين الاول ننظم تفكيرنا ونجتمع على هدف وراى ونستخدم عقلنا ونفكر بهدوء

تحياتى

April 16, 2008 at 6:50:00 PM GMT+2  
Blogger لحظة تأمل said...

انا متفقة معاك فى فكرة اننا لسه بدرى شوية على موضوع الاضراب

وكمان فعلا الضرب فى الجنيه اكتر من كده حرام

احنا محتاجين الاول ننظم تفكيرنا ونجتمع على هدف وراى ونستخدم عقلنا ونفكر بهدوء

تحياتى

April 16, 2008 at 6:50:00 PM GMT+2  
Blogger أحساس لسه حى ...أنا مش موافق said...

عزيزى
ليه بتقلل من قيمة الشعب المصرى

وتقول انه مخدش على الديمقراطية

مفيش مواطن يقول على شعبه كده ويشجع بكلمته دعاة الزعيم الاوحد

احنا اقل من جنوب افريقيا ولا السنغال ولا ليبريا ولا اقولك ميت بلد تانى

ليه مقولوش لسه بدرى علينا الشعوب دى

بس لكل شئ ثمن وده طبيعى يحصل حاجات خارجه فى اى اضراب

واوعى تفكر فى اروبا مفيش خساير برضوا فى اى اضرابات

روح اتفرج بعد اى ماتش مهم بيحصل ايه وساعات بيموت كام

مهما يحصل من حق اى شعب حتى لو فى الواق واق يعيشوا فى ديمقراطيه

مهما كان ثمنها

موضوع الجنيه انا معاك فى دى بقه

تحياتى

سلام

April 17, 2008 at 11:14:00 AM GMT+2  
Blogger أحساس لسه حى ...أنا مش موافق said...

عزيزى
ليه بتقلل من قيمة الشعب المصرى

وتقول انه مخدش على الديمقراطية

مفيش مواطن يقول على شعبه كده ويشجع بكلمته دعاة الزعيم الاوحد

احنا اقل من جنوب افريقيا ولا السنغال ولا ليبريا ولا اقولك ميت بلد تانى

ليه مقولوش لسه بدرى علينا الشعوب دى

بس لكل شئ ثمن وده طبيعى يحصل حاجات خارجه فى اى اضراب

واوعى تفكر فى اروبا مفيش خساير برضوا فى اى اضرابات

روح اتفرج بعد اى ماتش مهم بيحصل ايه وساعات بيموت كام

مهما يحصل من حق اى شعب حتى لو فى الواق واق يعيشوا فى ديمقراطيه

مهما كان ثمنها

موضوع الجنيه انا معاك فى دى بقه

تحياتى

سلام

April 17, 2008 at 11:14:00 AM GMT+2  
Blogger بنات صاحبة الجلالة said...

This comment has been removed by the author.

April 17, 2008 at 12:12:00 PM GMT+2  
Blogger بنات صاحبة الجلالة said...

مووضوعك رائع فعلا انا اؤيدك في اني اي مظاهرة او اضراب هيحصل في الوقت الحالي مش هيكون ليه غير نتيجة واحد بس زيادة القمع على المتظاهرين وضحايا ابرياء هيرحوا في شربة ميا اما فكرة الكتابة على الجنية اكيد طبعا الريس مش بيتعامل بالجنية اصلا علشان يشوفه ولو شافه مش هتفرق معاه اصلا

April 17, 2008 at 12:14:00 PM GMT+2  
Blogger micheal said...

هو مش منظم..اه معاك
بس مش معاك أننا نعارضه بالعكس أنا مشجع إضراب كل شويه ححتي لو وصل لاضراب كل أسبوع و العيار اللي ميصبش يدوش
تحياتي

April 17, 2008 at 4:07:00 PM GMT+2  
Blogger د/اجدع بنوته said...

معاك ف كل حرف قوللللته

بس مش معاك ف فكرة الجنيه

انا اى بريزه دلوقت بكتب عليها لا

ههههههههههههه

April 17, 2008 at 4:14:00 PM GMT+2  
Blogger Rania Lelah said...

بالنسبة لموضوع اضراب 4مايو فانا مش معاه و خالص
هيتفه قوى فكرة الاضراب
اما عن الشعب
فزى ما قلت
احنا لسه مش مؤهلين للديمقراطية اصلا
و المشكله ان فى ناس مش عارفة يعنى ايه ديمقراطية

اما بالنسبة للجنيه
فرايى الشخصى
مش هيعمل حاجة غير اننا هنثبت لنفسنا و للناس فى العالم
اننا شعب غير منظم و همجى
انه يشخبط على الجنيه عملتنا الى لازم تحترم

تحياتى

April 18, 2008 at 7:25:00 AM GMT+2  
Blogger Desert cat said...

يا سيدى الفاضل الاضراب السلمى ده شئ قانونى
طيب تفتكر الافضل اننا نعرفهم اننا معترضين على الاوضاع ولا نفضل ساكتين لحد ما ضهرنا يتقطم من كتر الاحمال من ضرائب فى زيادة ورسوم بتتحصل بدون اى مقابل
بخلاف ان مين قالك ان الكتابة على الجنية بتشوهه ما هو متشوه خلقه يعنى عاجبك منظره كدا
ان الله لا يغير ما بقوم حتى يغيروا ما بانفسهم كل واحد يبدا بنفسه ويعبر بايجابية لكن السكوت ده خوف وسلبية

تحياتى

April 18, 2008 at 5:58:00 PM GMT+2  
Blogger غادة said...

بص انا مش معاك فى ان مجتمعنا لسة مخدش على جو الديمقراطية ما هو احنا لو قعدنا نقول كده عمرنا ما هنحصل على ما نستحقه من الديمقراطيه و بعدين هيا فين الديمقراطيه دى ولا حرية التعبير دى احنا كل اللى بنعمله بنطالب بحقنا بس مش اكتر
و اظن اضراب 4-5 هيكون منظم عن المره اللى فاتت و محدش هيدى الأمن فرصه انه يتلكك بالشغب
اما بقى فكرة الكتابه على الجنيه مش حلوه اوى لأن على رأيك الضرب فى الميت حرام كفايه و حالته اللى لا تسر عدو ولا حبيب
تحياتى ليك
سلام مؤقت

April 19, 2008 at 3:22:00 AM GMT+2  

Post a Comment

Subscribe to Post Comments [Atom]

<< Home